कमला कॉलेजमध्ये मोफत नेत्र तपासणी शिबिर उत्साहात संपन्न

नंदादीप आय हॉस्पिटलच्या सहकार्याने मोफत नेत्र तपासणी

कोल्हापूर (प्रतिनिधी) :  ताराराणी विद्यापीठाच्या कमला कॉलेज येथे सामाजिक आरोग्य व सामाजिक समस्या जाणीवजागृती समिती आणि समाजशास्त्र विभाग यांच्या संयुक्त विद्यमाने नंदादीप आय हॉस्पिटलच्या सहकार्याने मोफत नेत्र तपासणी शिबिराचे आयोजन करण्यात आले. संस्थेचे कार्यकारी अध्यक्ष प्राचार्य डॉ. क्रांतिकुमार पाटील आणि महाविद्यालयाच्या प्राचार्या डॉ. तेजस्विनी मुडेकर यांच्या मार्गदर्शनाखाली शिबिर पार पडले.

विद्यार्थिनी, शिक्षक व शिक्षकेतर कर्मचाऱ्यांमध्ये नेत्र आरोग्याविषयी जागरूकता निर्माण करणे आणि दृष्टीदोषांचे वेळीच निदान व्हावे, हा या शिबिराचा प्रमुख उद्देश होता. या उपक्रमाला महाविद्यालयातील विद्यार्थिनी, शिक्षक व शिक्षकेतर कर्मचाऱ्यांनी उत्स्फूर्त प्रतिसाद देत मोठ्या संख्येने सहभाग नोंदविला आणि मोफत नेत्र तपासणीचा लाभ घेतला.

आजच्या डिजिटल युगात मोबाईल, संगणक आणि इतर डिजिटल उपकरणांच्या वाढत्या वापरामुळे डोळ्यांच्या आरोग्याची काळजी घेणे महत्त्वाचे झाले आहे. नियमित नेत्र तपासणी, योग्य प्रकाशात वाचन आणि डिजिटल स्क्रीनचा संतुलित वापर यांविषयी जागरूकता निर्माण करण्याच्या दृष्टीने हे शिबिर उपयुक्त ठरले. अशा आरोग्यविषयक उपक्रमांमुळे विद्यार्थिनींसह महाविद्यालयातील सर्व घटकांमध्ये आरोग्यविषयक सजगता वाढण्यास मदत होते.

या शिबिराचे नियोजन सामाजिक आरोग्य व सामाजिक समस्या जाणीवजागृती समिती आणि समाजशास्त्र विभागाचे समन्वयक डॉ. विश्वनाथ तराळ, डॉ. पूजा पाटील, डॉ. सारिका घाटे आणि श्रीमती चिन्मय सांगळे यांनी केले. नंदादीप आय हॉस्पिटलच्या सहकार्याने आयोजित या उपक्रमाला महाविद्यालयातील विद्यार्थिनी, शिक्षक व शिक्षकेतर कर्मचाऱ्यांचा उत्स्फूर्त प्रतिसाद लाभला. सामाजिक आरोग्याविषयी जागरूकता निर्माण करणारा हा उपक्रम यशस्वीरीत्या संपन्न झाला.

00000