पालकमंत्री चंद्रकांतदादा पाटील यांच्या प्रेरणेने आयोजित घरगुती गणपती सजावट स्पर्धेचे बक्षीस वितरण उत्साहात

सांगली (प्रतिनिधी-विनायक क्षीरसागर)

यंदाचा गणेशोत्सव, राज्योत्सव हा घरोघरी सांस्कृतिक वारसा जतन करणारा उत्सव झाला आहे. आणि त्यामुळे खऱ्या अर्थाने कुटुंबातील आनंद व एकोपा वाढला आहे, असे पालकमंत्री घरगुती सजावट स्पर्धेच्या बक्षीस वितरण सोहळ्याप्रसंगी चंद्रकांतदादा पाटील यांनी सांगितले. गेल्या १ महिन्यापासून सांगली, कुपवाड, मिरज भागात घरगुती सजावट स्पर्धेची विशेष तयारी पालकमंत्री कार्यालयामार्फत सुरू होती. या स्पर्धेच्या बक्षीस वितरण सोहळ्याचे आयोजन खरे मंगल कार्यालय, विश्रामबाग येथे करण्यात आले.

या वेळी प्रथम पारितोषिक ५१ हजार रुपयांचे सोन्याचे नाणे, प्रमाणपत्र व भेटवस्तू ऑपरेशन सिन्दूर देखाव्यासाठी महेश मारुती चौंदिकर यांना प्रदान करण्यात आले. द्वितीय पारितोषिक ३१ हजार रुपयांचे सोन्याचे नाणे, प्रमाणपत्र व भेटवस्तू नमामि गंगे जल शुद्धीकरण देखाव्यासाठी अमित अरुण पाटील यांना तर तृतीय पारितोषिक २१ हजार रुपयांचे सोन्याचे नाणे, प्रमाणपत्र व भेटवस्तू महा अवतार नृसिंह देखाव्यासाठी संजय मुरलीधर बांदिवडेकर यांना देण्यात आले.

याशिवाय १०० स्पर्धकांना उत्तेजनार्थ पारितोषिके व भेटवस्तू देण्यात आल्या. सजावट स्पर्धेचे आयोजन पालकमंत्री कार्यालय (GMO) द्वारे करण्यात आले होते. या प्रसंगी भारतीय जनता पक्षाचे दीपक बाबाशिंदे, भाजप जिल्हाध्यक्ष प्रकाश ढंग, दिनकर तात्या पाटील तसेच भाजप कोअर कमिटी सदस्य, माजी नगरसेवक, जिल्हा कार्यकारिणी सदस्य, मंडल कार्यकारिणी सदस्य, पाचशेहून अधिक स्पर्धक व इतर सर्व मान्यवर उपस्थित होते. या उपक्रमात मनपा क्षेत्रातील साडेतीन हजारांहून अधिक स्पर्धकांनी सहभाग नोंदवला होता. स्पर्धेत सहभागी प्रत्येक स्पर्धकाला विशेष भेटवस्तू व डिजिटल प्रमाणपत्र देऊन सन्मानित करण्यात आले.

सदर बक्षीस वितरणाचे आयोजन पालकमंत्री यांचे विशेष कार्य अधिकारी बाळासाहेब यादव, पालकमंत्री योजना हेल्पलाइन कार्यालयाचे समन्वयक विजय वरुडकर, नरेंद्र यरगट्टीकर, केदार खाडिलकर, डॉ. भालचंद्र साठ्ये व इतर पालकमंत्री प्रतिनिधींनी केले.